剪報與小回應

(10/8/2012的回應)

你可唔可以唔好攪我住嗰區呢？過主啦呀發展局。

文中所謂的美食專區已經專咗at least 10年，有啲食店仲要耐啲，我中學嗰時就已經幫襯。點解嗰度係"美食專區"呢，係因為附近一直係學校區，近十多年又漸漸有新樓盤，而譚公道一帶係舊樓，舖租平啲，又有客又有相宜租金先生存到；而唔係因為你美化呀、綠化呀而生存到。你攪嗰時沙塵滾滾，攪完業主咪加租囉。你咁即係玩謀殺"美食專區"啦！到時啲食店執粒我唔肯過你啊T^T仲要攪五街？由白宫變身嘅呼吸飯店才剛起步喎…你玩咩…仲有十三街呀！死啦…十三街俾佢攪完之後係咪會無晒啲街架…啲街名好有特色，全部都係由一種動物同埋一個形容該動物的字組成的。我曾經認識一個小朋友叫駿發，他的嫲嫲說是因為他在這條街出生，所以才為他這樣起名。如果條街無咗…

癡線架！過主啦！你去攪火星啦！

(13/8/2012的回應)

via cally yu

"words from Kiki Ho:

北帝街本身已是一條食街了，特色食肆老早已聚落經年，所謂的「美食專區」其實是趕走原有的小食肆、商戶，透過重建來打造一條租貴、價錢貴、單一、連鎖經營的食街。受重建影響的北帝街食肆，已有幾間關門大吉，貼上「市建局收樓」的手寫告示；上星期在欣榮花園「金怡」晚飯，一坐底老細即話今日最後一日，後會無期，我目定口呆。查問究竟，原來「翠華」空降，自願加月租到40萬，先迫走原鋪的「德昌」，再加上房協無恥的「市場主導」順勢加租一倍，老細話「做唔住啦！」因為最後一日，散得就散，瓜瓜菜菜都無哂，最後點了三色蒸蛋，啊，原來蒸蛋可以加蒜頭蒸，好味，特意叫了杯紅豆冰，百感交集。...

...成為最後一枱客，鋪出門口，眼前是炮仗街的重建項目，住戶商鋪都搬走，十室九空。我看到的，只是一條食街的消失......"

上次share同一篇新聞時叫發展局過主，話口未完就已經同我ko咗間德昌魚旦粉+金怡？好過份！！！可唔可以唔好邊度自然發展得好就叉隻腳埋嚟攪嘢扮成功爭取呢？


http://hk.apple.nextmedia.com/news/art/20120810/16591617

九龍城區更新方案下周諮詢

【本報訊】九龍城區有逾千幢樓齡50年或以上舊樓，大部份明顯失修。由發展局委任的九龍城市區更新地區諮詢平台公佈區內更新初步方案，建議優先重建土瓜灣五街和十三街、環字八街一帶等。此外，計劃亦將食肆林立的北帝街、譚公道和民泰街一帶變成「美食專區」。計劃將於下周二起，展開第一階段公眾諮詢，預計明年底定案。九龍城舊區面積約1,000公頃，重建潛力大。九龍城市區更新地區諮詢平台主席黃澤恩昨天表示，綜合地區人士意見和實地視察，並參考區內樓宇狀況後，推出「九龍城市區更新初步方案」，建議土瓜灣五街和十三街、九龍城道、落山道一帶和環字八街會優先重建，並發展為綜合商住用途，以釋放住宅用地。
北帝街附近變美食專區
黃澤恩指，重建可透過業主自發、市建局收購或私人發展商主導，「好難決定由市建局做定私人做，好似十三街面積比較大，但地積比已經用盡，好難吸引到私人發展，或者會將綜合發展區拆細，咁樣會比較易做啲，但都要諮詢公眾意見。」方案也建議復修和活化衙前圍道及紅磡溫思勞街、機利士南路一帶，並設立文物步行徑，由法定古蹟前九龍寨城衙門起步，沿途經龍津橋遺址、宋王臺石刻、牛棚、舊遠東飛行學校，最後抵達海心公園魚尾石。至於食肆林立的北帝街、譚公道及民泰街可美化和綠化，變身美食專區。