早晨的瑜伽課

scene 1

課室內，未上課，正等著老師。三兩中年婦人邊拉筋邊談天。

「哈哈！昨晚我發夢，夢見我去叫鴨仔。哈哈！一定係尋日講得太開心！

「我話，嗱，一齊去搵鴨仔，每人五舊，呢度排隊俾錢。到時甩底要俾雙倍錢！」

「嘩！洗唔洗咁貴呀~去飲吓嘢幾廿蚊得啦~」

「幾廿蚊嗰啲就唔好去啦~ 去搵泰仔呀~見識吓嘛~」

「泰仔靚仔咩？」

「都有啲幾靚仔架~見識吓之嘛，又唔係真係做！屋企都有個啦~ [外星人內心短評：你當屋企嗰個(老公)係鴨？！？！@.@] 阿乜太都同佢老公一齊去睇啲猛男脫衣show啦！」

「咁又係呀，都係見識吓，一齊飲吓嘢咁啫…」

「不過呢，我聽人講，叫鴨正過叫鷄架！」

「啲服務好啲？」

「係呀，佢地好識得點樣服待得你好舒服咁樣…」

「喂喂！唔好講啦…」

原來老師來了。上課時間。

[中年婦人們…一副我有甚麼沒有見過我怕誰的模樣。完全無敵… @.@]

* * *

scene 2

課堂中，最近瑜伽課室附近裝修，電鑽鑽鑽鑽。美人魚爸爸(瑜伽老師)說：

「我地又係時候要感謝電鑽哥哥啦~ 我地用om嚟同佢共鳴。

「吸氣——om————」

「om————」

「其實電鑽嘅聲音都係大自然嘅聲音，因為電鑽要用電，而電係由石油而嚟，石油喺好幾百萬年前嘅自然，我地只係喺依家將佢嘅力量釋放出嚟。而om係一切聲音嘅總和，所以當我地發出om嘅聲音，就可以中和咗電鑽嘅聲音。

「有好多時我地都會因為聽到一啲噪吵嘅聲音覺得好煩，喺嗰啲時候都可以用om喺同嗰啲聲音和應，咁你嘅心情就會平伏好多。有時候唔可以開聲咁樣om，喺個心裡面發出om嘅聲音都可以。」

om~~~

namaste.